bahan diambil dari sini..
Gong Xi Fa Chai
Oleh Ateng Sanusih
Seminggu lagi taon baru Imlek 2554 Gui Wei Jia Gwee bakalan tiba.Sodare kite dari suku Tionghoa udeh pada sibuk buat nyambut datangnye taon Sio Kambing Emas. Pusat perbelanjaan di kawasan Pecinan Glodok dan Manggadua udeh keliatan merah meriah dengan segala pernak pernik khas Imlek. Ada yang bilang kambing emas bisa ngasih pertanda keberuntungan dan idup lebih bagus. Coba aje buktiin, orang nyang punya logam emas di rumahnye, dia bakalan lebih kenceng narik duitnye. Logikanye dimane ? Coba aje liat, bukankah uang di bank, jaminannye kan emas batangan.
Perayaan Imlek taon ini boleh dibilang istimewa dan bermakna. Pasalnye Imlek 2003 dijadiin hari libur nasional. Mangkanye jangan heran kalo spanduk keliatan dipajang dimana-mana dengan ucapan Gong Xi Fa Chai. Biar kate keadaan ekonomi nasional lagi kagak karuan alias amsiong , tapi pusat perbelanjaan mulai keliatan diserbu orang buat negrayain Imlek. Rumah-rumah keluarga Tionghoa biasanya dihias buat nyambut sanak famili yang berkunjung. Di hari raya itu udah jadi kebiasaan orang ngasih angpao, hidangan jeruk mandarin dan kue cina.
Ngasih angpao di hari imlek jadi hal yang lumrah. Nyang ngasih niatnya tulus , kagak ngarepin imbalan apa-apa. Beda sama angpao yang biasa dikasih pengusaha buat pejabat atau wakil rakyat. Mereka ngasih sesuatu dengan harapan dapat imbalan dan bisa ngemplang lebih gede.
Pasar Bandeng.
Biasanye dulu saban taon Imlek , warga Betawi ikut nibrung ngerayain. Mereka nyebut Imlek ini dengan sebutan pasar malem nyang diadaain di Rawa Belong, Kebayoran Lama dan Cengkareng. Nah di pasar ini dijual ikan bandeng ukuran sekilo sampe dua kilogram per ekornye.
Warga Betawi sebelon taun delapanpuluhan punya tradisi unik. Setiap menantu musti ngebeliin bandeng pasar malem ini buat mertuanye kalo mau disebut mantu nyang baek. Sebaliknya mantu nyang diem aje kagak nyetor bandeng pasar malem bisa dicerein sama istrinye.
Tapi sebaliknya, biar menantu doyan kawin kalo ngasih bandeng pasar malem sang mertua bakal komentar : ” Biar die doyan kawin tapi saban pasar malem dia kagak pernah lupa ama gua. Mantu begini nih nyang bagus selalu ngopenin mertua”.
Sayangnye tradisi ini udah pupus, meski gaya sang mertua kayaknye ditiru para penggede penentu negeri ini. Coba aje liat, tuh konglomerat bangor nyang udeh nilep duit triliunan malah dielus-elus oleh pemerintah.
Pesta Barongsai.
Setelah dilarang selama 32 taon, atraksi kesenian barongsai sejak bergulirnya reformasi mulai marak lagi. Barongsai buat warga Tionghoa punya nilai religi. Kehadiran seni ini dianggap bisa membawa keberkahan di masa depan.
Kabarnye parayaan Imlek taon ini bakalan rame lantaran selain barongsai, warga Betawi bakal ikut ngegelar tanjidor dan ondel-ondel di kawasan pecinan Kota. Tambahan lagi, kalo warga Betawi bikin pemilihan Abang dan None Jakarta, maka mulai taon baru Imlek 2554 ini bakal diadain pemilihan Cici dan Koko. Seni dan budaya dari suku manapun juga di Nusantara ini bagaikan warga warni bunga di taman. Makin banyak dan beragam makin cantik dan indah dipandang.
(Penulis pengamat sosial)
Copyright © Sinar Harapan 2002
